|
p. 248
Cesar Auguste multum mirabilis,
Qui frena regis orbis instabilis,
Ad te defertur vox satis habilis;
Esto, si placet, illi placabilis.
Ut aboleres mundi maliciam
Et revocares iuris iusticiam,
Iungeres pacem huic in sociam,
Rex tibi regum dedit potenciam.
Grandia bona, septra regalia,
Addidit idem imperialia:
Nam tuis iussis servit Ytalia
Omnibus hiis plus dulcis Dania.
Cunta cohartas armis et legibus:
Mundus stat totus sub tuis pedibus;
Est tibi datum a summis sedibus,
Ut extollaris pre cuntis regibus.
Tua vis, Cesar, non est in terminis;
Namque virtutem transcendis hominis,
Ut ita dicam cuiusdam numinis
Instar, ostendit lictera nominis.
Nullus in mundo Cesare grandior,
Nullus sub sole Cesare forcior,
Nullus sub luna Cesare clarior,
Nullus ubique Cesare doctior.
Tibi fortissimo prole multiplici
Nil unquam potest et contra obici;
Placuit, placet eterno iudici,
IJt tibi mundus debeat subici.
Tibi debetur extrema regio;
Iam contremiscit papalis legio,
Patris et patrum falsa religio;
Omnia vincis hominis prelio.
p. 249
Te iam expectat omnis victoria;
Luget in parte lesa Liguria,
Ad se te vocat grandis Theothonia:
De te prolata sunt vana sompnia.
Cum tua cura sit valde provida,
Aures benignas dictis accomoda:
Tollas malicias, destruas orrida;
Substinent multi multa incomoda.
Res est enormis et multum devia;
Prevalent hodie seva periuria,
Per que dampnantur corda fidelia
Et tota urget regni discordia.
Lux est in tenebris, dum res sic agitur:
Solvitur reus, iustus occiditur;
Palea granum male discutitur:
Quid potest facere qui sic concluditur ?
Itur ad curiam lapsis vestigiis:
Extuat curia plena litigiis.
Stant ibi miseri velut in Stigiis;
Cadit qui non est fultus ausiliis.
Sedent per diem iusticiarii,
Qui querunt aurum, et camerarii;
Sedent cum istis et multi alii,
Qui scribunt acta, celsi notarii.
Istis debentur prima donaria,
Sed tibi, Cesar, post secundaria;
Omnia dona, lauta cibaria,
Echini, rumbi, quos ducunt maria.
Assident iudices, tendentes recia;
Longa decurtant, prolongant brevia.
Multum defertur danda sentencia,
Ni prius veniant burse consilia.
p. 250
Stant advocati ad litis opera;
Hii lanas albas et fulva vellera
Tondent et mungunt omnia pecora.
Postea clamant usque ad sidera.
Clamat philosophus petens subtilia,
Respondet grecus dicens similia;
Iudex barbatus ex parte alia,
Et multi alii canentes talia.
Clamat Cifridus ore nephario,
Qui variatur ordine vario;
Certat pro uno solo denario
Per diem totum cum adversario.
Calamus iste non vult plus ludere.
Vivat Augustus quantum vult vivere,
Imperet, regnet in tanto tempore,
Ut suos hostes possit confundere.
|
4
8
12
16
20
24
28
32
36
40
44
48
52
56
60
64
68
72
76
80
|
