UNIVERSITÀ DI MILANO UNIVERSITÀ DI NAPOLI FEDERICO II UNIVERSITÀ DI PALERMO UNIVERSITÀ CA' FOSCARI (VENEZIA) UNIVERSITÀ DI VERONA

ALIM - Archivio della latinità italiana del Medioevo

Clara Assisiensis, Benedictio

p. 2323

Incipit Benedictio eiusdem sanctae Clarae sororibus suis praesentibus
et futuris.

In nomine Patris et Filii et Spiritus Sancti.
Benedicat vobis Dominus et custodiat vos;
ostendat faciem suam vobis et misereatur vestri;
convertat vultum suum ad vos et det vobis pacem,
sororibus et filiabus meis, et omnibus aliis venturis et permansuris
in nostro collegio et ceteris aliis tam praesentibus quam futuris,
quae finaliter perseveraverint in omnibus aliis monasteriis pauperum
dominarum.
Ego Clara, ancilla Christi, plantula beatissimi patris nostri sancti
Francisci, soror et mater vestra et aliarum sororum pauperum, licet
indigna, rogo Dominum nostrum Iesum Christum per misericordiam
suam et intercessionem sanctissimae suae genitricis sanctae Mariae

p. 2324

et beati Michaëlis archangeli et omnium sanctorum Angelorum Dei
et beati Francisci patris nostri et omnium Sanctorum et Sanctarum,
ut ipse Pater caelestis det vobis et confirmet istam sanctissimam
suam benedictionem in caelo et in terra: in terra multiplicando
vos in gratia et in virtutibus suis inter servos et ancillas suas in Ecclesia
sua militanti; et in caelo exaltando vos et glorificando in Ecclesia
triumphanti inter Sanctos et Sanctas suas.
Benedico vos in vita mea et post mortem meam, sicut possum
et plus quam possum, de omnibus benedictionibus, quibus Pater
misericordiarum filiis et filiabus benedixit et benedicet in caelo
et in terra; et pater et mater spiritualis filiis et filiabus suis spiritualibus
et benedixit et benedicet. Amen.
Estote semper amatrices Dei, animarum vestrarum et omnium
sororum vestrarum; et sitis semper sollicitae observare quae Domino
promisistis. Dominus vobiscum sit semper et nunc vos sitis
semper cum ipso. Amen.
Explicit Benedictio sanctissimae matris nostrae Clarae.